Á árinu 2020 kolefnisjafnaði Reginn árlega losun 707,4 tonna af CO₂ frá starfsemi sinni með endurheimt votlendis hjá Votlendissjóði. 

Á síðastliðnum árum hafa verið gerðar ítarlegar greiningar á þeim þáttum sem hafa hvað mest umhverfisáhrif í rekstri eigna félagsins. Umhverfisvottanir fasteigna spila þar stórt hlutverk. Með það að markmiði að minnka neikvæð umhverfisáhrif hefur verið farið í ýmsar aðgerðir til að minnka orkunotkun, endurnýjun lýsingar og ljósastýring, orkuvöktun gerð markvissari og keyptir rafknúnir bílar. Þá hefur aukin áhersla verið lögð á sorpflokkun með aukið flokkunarhlutfall í huga, innkaup umhverfisvottaðra ræstivara og endurnýtingu byggingarefnis.

Unnið var að nokkrum stærri verkefnum á árinu sem hluta af grænni vegferð félagsins. Ber þar helst að nefna BREEAM In-use umhverfisvottun Höfðatorgs, áframhaldandi þróun á snjallsorpi og innleiðingu rafrænnar þjónustu sem gerir félaginu fært að stunda pappírslaus viðskipti. Lausnir sem hvetja viðskiptavini félagsins til að huga að sínum neikvæðu umhverfisáhrifum.

Unnið hefur verið að þróun rafrænna lausna sem styðja við sjálfbærnimarkmið félagsins.

Snjallsorpslausn hefur verið í mótun í eignum Regins frá 2018 og var fyrsta sorpflokkunarstöðin tekin í notkun á Hafnartorgi haustið 2019. Snjallsorpið skráir magn og sorpflokka niður á leigutaka og gerir með því hvern leigutaka ábyrgan fyrir sinni flokkun og þeim kostnaði sem hlýst af því sorpi sem til fellur. Reynsla er nú komin á snjallsorpið og hefur lausnin gefið góða raun. Sést það best á greinilegum mun á árangri í flokkun en hlutfallið á Hafnartorgi var 25% hærra en í öðrum eignum í rekstri árið 2020. Undirbúningur fyrir innleiðingu snjallsorps í Smáralind er þegar hafinn og verður tekin ný og endurbætt flokkunarstöð í gagnið þar á vormánuðum 2021. Lausnin í Smáralind byggir á sömu grunnhugmynd og sú á Hafnartorgi en verður töluvert umfangsmeiri í sniðum. Þá er til skoðunar að setja upp snjallsorp í fleiri eignum félagsins. Með aðstoð tækninnar geta notendur nálgast upplýsingar um eigin árangur í sorpflokkun og þróun milli mánaða á þjónustuvef Regins.

Þjónustuvefur Regins, sem nánar er gerð grein fyrir undir lykilverkefnum ársins, er mikilvægt verkfæri í sjálfbærniþróun félagsins. Með þjónustuvefnum næst fram greinargóð upplýsingagjöf og hvatning til viðskiptavina um að leggja sitt af mörkum við að draga úr losun koltvísýrings. Aðgengi að umhverfisupplýsingum eins og frá snjallsorpi gerir fyrirtækjum kleift að setja sér mælanleg umhverfismarkmið og fylgjast með árangri starfsmanna með lifandi upplýsingum.

Reginn hefur sett sér markmið um að draga úr notkun á pappír og útprentun efnis. Sem liður í því var rafræn skeytamiðlun tekin upp síðla árs 2019. Þá hefur útgáfu prentaðra reikninga alfarið verið hætt frá ármótum 2020 og eru nú einungis sendir út rafrænir reikningar á alla leigutaka félagsins. Einnig var innleidd rafræn undirritun en skv. upplýsingum frá Taktikal spöruðust með því um 460 ferðir og 4.000 km í ferðalög. Áætla má að með því hafi sparast 508,5 kgCO2í sem annars hefðu verið losuð út í andrúmsloftið.

Til að hvetja til orkuskipta við samgöngur hefur Reginn fjárfest í 42 rafbílahleðslustöðvum og sett þær upp við þrjú af kjarnasvæðum félagsins, Smáralind, Höfðatorg og Egilshöll. Árið 2020 voru bifreiðar hlaðnar 8.500 sinnum á þessum hleðslustöðvum og dugar orkan til að keyra fólksbíl yfir 300 sinnum hringinn í kringum landið. Áætla má að með því hafi sparast um 60 tCO₂í sem annars hefðu verið losuð út í andrúmsloftið.

Til að styðja við auknar áherslur viðskiptavina um fjölbreyttari samgöngumáta og áherslur félagsins á grænar samgöngur við fasteignir sínar, hefur Reginn fjárfest í hjólageymslum við um þriðjung af eignum félagsins. Í heildina hefur Reginn sett upp hjólastæði- eða grindur fyrir um 940 hjól og er um 70% af stæðunum í læstum, upphituðum og öruggum hjólageymslum. Nýjasta viðbótin er tvískipt hjólageymsla við Smáralind sem var opnuð í desember 2020 og tekur rúmlega 100 reiðhjól. Önnur geymslan er vöktuð hjólageymsla fyrir viðskiptavini Smáralindar þar sem góð aðstaða er til að hlaða rafmagnshjól og verkfæri fyrir léttari viðgerðir. Hin geymslan er aðgangsstýrð hjólageymsla fyrir starfsfólk Smáralindar.

Orkunotkun er breytileg eftir eðli þeirrar starfsemi sem er í viðkomandi húsnæði. Losun gróðurhúsalofttegunda vegna orkuframleiðslu vegur þyngst í rekstri fyrirtækisins. Þessi orkunotkun er öll notkun á heitu vatni, bæði til upphitunar og heitu neysluvatni sem og öll raforka sem viðkomandi eignir Regins nota. Einnig er hluti af heildarorkunotkuninni öll notkun eldsneytis á farartæki í eigu félagsins.

Reginn vaktar orkunotkun í eignum í rekstri og eru frávik í orkunotkun greind. Auknar upplýsingar um notkun gera félaginu kleift að grípa fyrr inn í ef um frávik er að ræða, veita betri innsýn í orkufrekustu þætti starfseminnar og varpa ljósi á hvar aðgerða er þörf. Þegar skoðuð er þróun á orkunotkun frá árinu 2018 þá hefur heildarorkunotkun dregist saman um 7%.

Reginn notast við EnviroMaster hugbúnaðalausn frá Klöppum til að halda utan um upplýsingar varðandi rafmagns- og vatnsnotkun, sorp og eldsneytisnotkun í þeim eignum sem félagið sér um rekstur í. Frá árinu 2019 hefur Reginn nýtt sér viðbótarþjónustu Klappa sem gerir kleift að taka út umhverfisskýrslur ársfjórðungslega.

Auðveldar það félaginu að vakta umhverfislega mikilvæga þætti, fylgja markmiðum eftir og upplýsa stjórnendur og fjárfesta um framvindu.

Mannréttindi eru ein af grundvallarstoðum samfélagsins og fylgir Reginn mikilvægum grunngildum er varða mannréttindi í allri sinni starfsemi. Tryggja skal jöfn tækifæri og laun án tillits til kynþáttar, litarháttar, kynferðis, tungu, trúar, skoðana, þjóðernis, uppruna, eigna, ætternis eða annarra aðstæðna. Til að sporna gegn áhættu á mannréttindabrotum gerir félagið kröfur til sinna leigutaka, verktaka og birgja að starfsemi þeirra sé ávallt í samræmi við lög og reglur á hverjum tíma og brjóti ekki gegn almennum mannréttindum, s.s. réttindum á vinnumarkaði og góðum aðbúnaði á vinnustað. Einnig staðfesta verktakar og birgjar að bera svokallaða keðjuábyrgð skv. lögum. Þá hefur Reginn sett sér starfs- og siðareglur sem kveða á um að virðing, sanngirni, kurteisi og sæmd skulu einkenna öll samskipti við viðskiptavini, samstarfsmenn og aðra sem stofnað er til viðskiptasambands við.

Reginn leggur mikið upp úr velferð og heilsueflingu starfsmanna þar sem stuðlað er að bæði andlegri og líkamlegri heilsu. Félagið veitir heilsustyrki árlega, innan þess er virkt starfsmannafélag.. Reginn styður við heilsueflingu starfsmanna með heilsustyrk og jákvæðu viðhorfi til heilsueflingar og heilbrigðs lífernis. 62% starfsmanna nýttu sér heilsustyrkinn 2020. Félagið veitir einnig orlofsstyrk sem var nýttur af 49% starfsmanna árið 2020. Starfandi er íþróttanefnd sem skipuleggur ýmsa heilsueflandi viðburði, svo sem líkamsrækt, hjólaferðir, fjallgöngur og golf. 

Árið 2020 voru veikindadagar 3,37 að meðaltali á starfsmann, sem er fækkun sem nemur 32% frá árinu áður, og þrjú slys. Við vinnu er áhætta takmörkuð eftir fremsta megni og menn klæðast vinnuverndarbúnaði. Til að stuðla að öruggu starfsumhverfi starfsmanna eru t.d. haldin námskeið fyrir starfsmenn um eldvarnarhættu, skyndihjálp og námskeið um meðhöndlun vinnuvéla. Ef um vinnuslys er að ræða eru þau tilkynnt til vinnueftirlitsins. Hvert slys er metið fyrir sig og kappkostað að fyrirbyggja sambærileg slys með bættum búnaði eða aðbúnaði, eftir því sem við á. 

Starfræktar eru nefndir á vinnustaðnum sem ætlað er að fyrirbyggja og taka á málum sem tengjast kynferðislegri áreitni, ofbeldi og einelti. Hjá félaginu gildir félagafrelsi starfsmanna.

Félagið hefur sett sér starfskjarastefnu sem felur í sér það yfirlýsta markmið að laða til sín hæfustu einstaklinga á hverjum tíma, greiða samkeppnishæf laun og viðhalda samkeppnisstöðu félagsins. Starfandi er starfskjaranefnd og er hlutverk nefndarinnar að vera leiðbeinandi fyrir félagsstjórn og framkvæmdastjórn um starfskjör æðstu stjórnenda félagsins og ráðgefandi um starfskjarastefnu. Við ákvörðun um starfskjör er horft til ábyrgðar og árangurs og gætt að jafnréttissjónarmiðum.

Í sjálfbærnistefnu félagsins er áréttað að hvers kyns spilling, mútur af einhverju tagi eða önnur ólögleg starfsemi sé ekki liðin undir neinum kringumstæðum. Félagið framfylgir góðu viðskiptasiðferði á gagnsæjan hátt og í samræmi við verklagsreglur og takmarkar þannig áhættu af spillingu, mútum og annarri ólöglegri starfsemi. Á árinu 2020 komu ekki upp nein mál tengd spillingu eða mútum. Í samræmi við sjálfbærnistefnu félagsins skulu allir birgjar og samstarfsaðilar félagsins kynna sér siðareglur Regins, staðfesta þær og framfylgja þeim. Félagið hefur sett sér stefnu um aðgerðir gegn peningaþvætti og fjármögnun hryðjuverka sem hefur þann tilgang að koma á og viðhalda skilvirku kerfi til að sporna við áhættu á því að þjónusta og eignir Regins og dótturfélaga séu notaðar í ólöglegum tilgangi. Það er stefna félagsins að stunda hvorki viðskipti við aðila sem teljast áhættusamir né tengjast slíkum aðilum. Félagið leitast þar af leiðandi við að velja birgja sem sýna samfélagslega ábyrgð og hafa gott viðskiptasiðferði að leiðarljósi.

Starfs- og siðareglur Regins gilda um alla starfsemi, alla starfsmenn og stjórnendur samstæðunnar. Við ráðningu staðfesta starfsmenn að þeir hafi lesið, skilið og muni starfa eftir reglunum. Markmið þeirra er að mæla fyrir um almennar skyldur starfsmanna til þess að stuðla að heiðarleika, réttsýni og sanngirni í viðskiptum og efla traust viðskiptavina og almennings á félaginu. Reglurnar endurspegla mikilvæg gildi á borð við áreiðanleika, sanngirni og jafnræði sem grundvallast á því að starfsmenn félagsins skulu koma fram af heiðarleika og trúnaði og eru bundnir þagnarskyldu lögum samkvæmt um hvaðeina sem þeir kunna að verða áskynja í starfi sínu varðandi viðskiptavini og um starfsemi félagsins. Starfsmenn og stjórnendur skulu aldrei láta einkahagsmuni stangast á við hagsmuni félagsins eða viðskiptavina þess. Starfsmönnum ber að tilkynna mögulega hagsmunaárekstra til regluvarðar eða næsta yfirmanns.

Reginn varðveitir persónuupplýsingar á öruggan hátt í samræmi við gildandi lög og reglur um persónuvernd. Reginn hefur sett sér persónuverndarstefnu til að tryggja öryggi persónuupplýsinga ásamt því að setja sér samkeppnisstefnu.

Á tólfta starfsári sínu er félagið ennþá í vexti og þróun og er Reginn afar stolt af þeim viðurkenningum sem félagið hefur hlotið í gegnum árin. Á árinu 2020 hlotnuðust félaginu viðurkenningar sem eru staðfesting þess að félagið sé á réttri braut.

Reginn hlaut viðurkenninguna Framúrskarandi fyrirtæki 2020 og var því eitt af 2% íslenskra fyrirtækja sem uppfylla skilyrði greiningar CreditInfo en félagið hefur hlotið viðurkenninguna á hverju ári frá árinu 2014. Félagið var einnig eitt af 2,8% fyrirtækja á landinu til að vera á lista Viðskiptablaðsins og Keldunnar yfir Fyrirmyndarfyrirtæki í rekstri 2020 og lenti þar í sjöunda sæti, efst íslenskra fasteignafélaga. Í ágúst 2020 hlaut Reginn síðan viðurkenningu Stjórnvísis sem fyrirmyndarfyrirtæki í góðum stjórnarháttum 2019-2020 en þeirri viðurkenningu er ætlað að ýta undir aðgerðir sem efla góða stjórnarhætti. Í byrjun árs 2021 var Smáralind efst í flokki verslunarmiðstöðva í niðurstöðum Íslensku ánægjuvogarinnar. Rannsóknin mælir ánægju viðskiptavina gagnvart fyrirtækjum en einnig er horft til annarra þátta eins og ímyndar, mat á gæðum og tryggð viðskiptavina. Jafnframt var gerð jafnlaunagreining á árinu og fékk félagið gullmerki jafnlaunavottunar PwC sem þegar hefur verið fjallað um hér að framan.

Reginn hefur skilgreint fjóra lykilmælikvarða efnahagslegrar sjálfbærni í áhættustefnu félagsins og snúa þeir að fjölgun BREEAM vottaðra eigna, eiginfjárhlutfalli, arðsemi eigin fjár og skuldahlutfalli.

Einn af lykilþáttum í áhættustefnu félagsins er að setja mörk og skilyrði á helstu áhættuþætti félagsins. Í því sambandi er fjölgun BREEAM In-use vottaðra eigna í eignasafni félagsins mikilvæg m.a. til að fjölga eignum  í grænni fjármögnunarumgjörð félagsins.  Reginn skráði á árinu græna umgjörð fyrir útgáfu grænna skuldabréfa og er grænu umgjörðinni ætlað að styðja við fjármögnun á umhverfisvænum verkefnum. Í lok árs var bókfært virði vottaðra eigna undir grænu umgjörðinni 21.078 millj.kr. og græn fjármögnun 16.084 millj.kr. eða 18% af lánasafni félagsins en markmið ársins 2020 var 15%. Félagið hefur sett sér markmið um að helmingur eigna félagsins verði BREEAM In-use vottaðar í lok árs 2025 en í lok árs 2020 var hlutfallið komið í 23%.  Með fjölgun vottaðra eigna Regins mun svigrúm til grænnar fjármögnunar félagsins aukast enn frekar. 

Fyrir árið 2020 var markmið stjórnar að eiginfjárhlutfall færi ekki undir 30% og náðist það markmið með 31% hlutfalli. Markmið um arðsemi eiginfjár er að arðsemi sé að jafnaði hærri en 10% en reyndist 3% árið 2020 sem skýrist einna helst af áhrifum Codiv-19 faraldursins. Þá er markmið stjórnar að skuldahlutfall fari ekki yfir 65% en á árinu 2020 var hlutfallið 63%. Hér að neðan má sjá þróun þessara lykilþátta undanfarin 5 ár.