Almennar fréttir / 5. desember 2014

VÍS tryggir Reginn fasteignafélag

Samið hefur verið um að VÍS tryggi Reginn fasteignafélag og dótturfélög þess til næstu þriggja ára. Reginn leitaði tilboða hjá öllum helstu tryggingafélögum landsins og gekk í kjölfarið til samninga við VÍS.  

 „Reginn er með margar og stórar fasteignir á sínum snærum og við fögnum því að fá þetta kraftmikla félag í hóp okkar viðskiptavina,“ segir Sigrún Ragna Ólafsdóttir forstjóri VÍS. „Samningurinn felur meðal annars í sér virkt samstarf í öryggis- og forvarnamálum þar sem sérfræðingar VÍS verða til ráðgjafar. Allir hafa hagsmuni af því að vel takist til og við leggjum mikið upp úr því.“

 „Starfsemi okkar er umfangsmikil því Reginn er með stórt og verðmætt fasteignasafn þar sem margþætt og viðamikil starfsemi á sér stað, þar á meðal Smáralind og Egilshöll. Ég bind miklar vonir við samstarfið og áherslur VÍS í forvörnum eiga án efa eftir að koma Regin sem og viðskiptavinum okkar til góða,“ segir Helgi S. Gunnarsson forstjóri Regins.

Reginn hf. er íslenskt fasteignafélag sem fjárfestir í, leigir út og rekur atvinnuhúsnæði. Fasteignasafn fyrirtækisins telur 54 fasteignir og er heildarfermetrafjöldi þeirra um 223 þúsund. Félagið er hlutafélag í dreifðu eignarhaldi og skráð í Kauphöll Íslands.


VÍS er stærsta tryggingafélag landsins og býður alhliða tryggingalausnir fyrir einstaklinga, fyrirtæki, sveitarfélög og stofnanir. Fyrirtækið er skráð í Kauphöll Íslands og er í dreifðu eignarhaldi. VÍS starfrækir þjónustuskrifstofur víðsvegar um land og starfa um 200 manns hjá fyrirtækinu.

 

Annað fréttnæmt

20. nóv.

HSN flytur í Sunnuhlíð um áramót

Framkvæmdir við nýja heilsugæslu í Sunnuhlíð á Akureyri ganga vel og mun Heilbrigðisstofnun Norðurlands flytja í húsnæðið upp úr áramótum. Enn eru nokkur laus rými til ráðstöfunar og áfram er sérstök áhersla lögð á að bæta við rekstraraðilum í heilsutengdri þjónustu og verslun.
17. nóv.

Landsvirkjun flytur í Höfðatorgsturninn

Mikill áhugi hefur verið meðal fyrirtækja að vera með aðsetur í Höfðatorgsturninum í Katrínartúni 2. Í maí sl. var ritað undir grænan leigusamning við Landsvirkjun fyrir um 4.500 m2 í húsinu og mun starfsemi þeirra dreifast á fimm hæðir.