Almennar fréttir / 13. mars 2020

Reginn og Vegagerðin skrifa undir leigusamning

Forstjóri Vegagerðarinnar og forstjóri Regins hf. skrifuðu í dag undir leigusamning um byggingu nýrra höfuðstöða Vegagerðarinnar við Suðurhraun í Garðabæ. Reginn mun byggja húsnæðið og eiga en Vegagerðin leigja til langs tíma. Eldra húsnæði í Suðurhrauni verður nýtt að einhverju leyti en mestmegnis er um nýsmíði að ræða.

Með nýjum höfuðstöðvum verður starfsemi Vegagerðarinnar á höfuðborgarsvæðinu sameinuð á einn stað en Vegagerðin er nú á þremur stöðum, í Borgartúni, Vesturvör í Kópavogi og í Hringhellu í Hafnarfirði. Húsnæðið í Borgartúni er gamalt og hentar illa fyrir starfsemi Vegagerðarinnar. Nýja húsnæðið tekur fullt mið af þörfum Vegagerðarinnar. Þar munu allir vinna í opnu rými, lögð verður áhersla á birtu og hljóðvist og mismunandi verkefni starfsmanna. 

Bergþóra Þorkelsdóttir forstjóri Vegagerðarinnar sagði í dag að þetta væri stór dagur fyrir Vegagerðina enda hefði verið stefnt að því lengi að komast í nýtt húsnæði. "Við erum að sameina þrjár starfsstöðvar í eina og það hefur verið lögð mikil vinna í að hanna húsnæði sem hentar mismunandi starfsemi Vegagerðarinnar á höfuðborgarsvæðinu, þar sem blandast saman hefðbundnari skrifstofuvinna og grófari vinna þjónustustöðvarinnar sem sinnir ýmiskonar vinnu á vegakerfinu á svæðinu," bætti hún við.

Helgi S. Gunnarsson forstjóri Regins sagði að þetta væri mjög jákvætt verkefni sérstaklega á þessum tíma. "Við verðum með allt að 100 manns í vinnu við þetta verkefni þegar mest verður. Þetta er töluverð fjárfesting en við erum að nýta mannvirki sem eru til staðar og svæðið líka. Framkvæmdir hefjast strax á mánudag en undirbúningur hefur staðið yfir, við ætlum að vinna hratt og ljúka þessu á 12 mánuðum. Í dag er því yfir  þriðjungur af eignasafni Regins í leigu til opinberra aðila en eitt af yfirmarkmiðum Regins er að hafa hlutfall tekna frá opinberum aðilum þetta hátt enda um stöðuga og örugga leigusamninga að ræða þar sem leigutíminn er oft á tíðum lengri en gengur og gerist" sagði Helgi. 

Annað fréttnæmt

02. jún.

Fasteignamat 2022

Fasteignamat fasteigna Regins hækkar um 4,9% milli áranna 2021 og 2022 skv. nýbirtu mati Þjóðskrár.
15. mar.

Reginn stofnaðili í "Römpum upp Reykjavík"

Reginn er einn stofnaðila verkefnisins Römpum upp Reykjavík en markmiðið er að koma fyrir 100 römpum í Reykjavík fyrir fólk á hjólastólum, eins fljótt og auðið er.
10. feb.

Reginn hefur birt ársuppgjör fyrir 2020

Afkoma Regins á árinu 2020 er lituð af þeim aðstæðum sem upp hafa komið í samfélaginu í tengslum við COVID-19. Rekstrartekjur námu 9.736 m.kr. og þar af námu leigutekjur 9.170 m.kr.